kulupu pi sitelen tenpo
2025-08-05
5:34pm
mi pini e pali nanpa mi... ken la. (lon la ona li pini ala. o moli e nanpa a.)
mi o kepeken tomo pi sitelen lili sama lipu tenpo anu seme? mi lukin e lipu ante la jan mute li ni. lipu li musi. tenpo pini la mi sitelen lon lipu Neocities la mi sitelen e tenpo mi. ona la mi ken kama sona e ni: tenpo la mi seme. ni la mi ken kepeken sona ni tawa pali tenpo.
ni la, mi o sitelen e tenpo mi pi suno ni:
- 7-9am: mi pini lape li moku li pali nanpa
- 9am-12pm: mi pali nanpa. mi kepeken lipu 대치동수학 대수 유형편 p. 60-64. mi pilin ike tan ni: mi wile pini pali lon tenpo lili li wile kepeken ilo Egrit
- 12pm-3pm: mi lukin e lipu musi pi sitelen kule
- 3pm-5pm: mi pali nanpa (li lukin e ilo tan ala kin a a a) lon lipu lili. mi kepeken wawa mute tawa tenpo lili la mi pini lon tenpo lili. pona a!
tenpo 6pm la mi wile pini pali e lipu 유형편 p.64-65
ante la mi o toki e seme? mi sitelen lon lipu ni lon lipu Google Docs ala la seme li pona?
...a ken la mi o sitelen tawa utala sitelen mi
2025-08-06
1:04pm
tenpo poka la mi lon tomo lipu. mi wile pali taso lipu wan lon supa li jo e mi.
mi lukin e lipu li sitelen e ona. mi wile ante lili e ona li wile pana e ona lon lipu ni.
kin la, tomo sona li wile e mi lon utala toki lon ma Sonto lon tenpo mun #LL. seme a
2025-08-07
1:19pm
tenpo mute la, mi lukin e jan pi pali mute li pilin e ni: mi pali ala. mi wile pali sama jan ni. taso mi pali la mi pilin pona ala li lukin e jan ante pi pali mute li pilin e ni: mi pali lili li ike. taso ken la, pali li suli ala. kama sona tan pali li suli.
2025-08-08
6:30am
mi pini lape lon tenpo lili a!
mi kama sona e ni: jan li sitelen e ni lon linluwi la ona li pana ala e ijo ale lon lawa ona a a a
taso ni li lipu mi! jan ala li ken toki e ni: mi o sitelen e seme. mi pana ala e unpa e jaki, anu seme
2025-08-11
7:52am
muu! mi lon :D
tenpo pini la mi open sitelen tenpo la mi mu. tenpo lon la, mi ken ni sin!
jan ala li lukin e ni, anu seme. kin la, jan li lukin la, seme li ante? ona li ken ala moli e mi. tenpo poka la mi toki tawa jan Ava (tan avas.space) la ona li toki pona tawa mi! taso ike la mi pana e nimi Anku mi tawa ona. wile mi la ona li kepeken ala e sona ni a a a (a mi kepeken 'kepeken e' sama tenpo pini)
tenpo suno ni la mi wile tawa tomo lipu li wile sitelen tawa utala toki tawa utala sitelen. suno li lon sewi la mi tawa tomo li moku la mi ken kute e EBS English wan. mi wile ala e ni taso tomo sona li wile e ni la
poka la, wile sona pi toki Inli pi kulupu EBS la wile sona kute li lon. taso kalama ona li kepeken tenpo suli a la mi pilin ike.
ante la, mi wile toki e suno pi toki pona! ken la mi ken lon e ni lon tomo sitelen (tenpo mute la 'lon e' li pakala pi jan sin. tenpo ni la ala. tenpo poka la mi lukin e toki ni: 'sorry cant be in my room now. pipi mute li lon e ni')
2025-08-11
9:11am
mi weka lape la mi telo e mi a! tomo sona li wile ala e mi la mi kama wile telo ala e mi lon tenpo mute. taso ona li pini lon tenpo poka :<
tenpo suno pini la, mi wile ante e sitelen mi nanpa wan lon tenpo pi suno open, li wile kute e sitelen tawa EBS English lon tenpo pi suno meso. lon la, mi sitelen e ijo ante lon suno open li open e sitelen nanpa tu lon suno meso.
mi (en ilo Sasipisi) pali e nasin lon open pi tenpo esun ni la1 mi wile e ni lon tenpo suno ni: suno open la mi sitelen nanpa tu, suno meso la mi pali e ijo pi tomo sona (lon nasin pi sona ala), suno pini la mi ijo EBS English.
mi sona ala e ni: suno open la mi ken ala ken pini e pali nanpa mi li ken ala ken sitelen, taso mi alasa a! kin la tenpo suno ni la mi ken lon tomo lipu pona lon tenpo mute.
a kin la jan sona mi pi toki Inli li pana e toki musi pi jan lili tawa mi. jan lili ni li tan kulupu mi li tan kulupu ante kin. mi o pana:
"you look like a teenage girl" -Irene
"sina lukin sama meli lili" -jan Alin
ona li mije.
"you die faster than us because you are old" -???
"sina moli lon tenpo lili tawa mi tan ni: sina majuna" -???
"the earth is a donut" "wait, i am a donut?"
"ma ni li sama moku sike li jo e lupa lon insa" "o awen, mi moku?"
5:31pm
mi wile sitelen e ijo mute taso mi sona ala e ni: seme la mi open.
tenpo poka la mi lukin e sitelen tawa ni lon ilo Jutu: jan majuna li pakala e tomo suli pi tenpo pini tan nasin lawa ike. toki anpa ilo la jan wan li toki: tan ni la jan majuna o moli. jan ante li toki: lon a, tenpo pini la jan majuna li pana e sona taso tenpo mi la ilo li ken ni. n... jan pakala ni li... jan wan taso? kin la sona jan mute la ilo li sona ala e ona? tan seme la sina wile moli e jan tan jan ike wan? jan mute pi ilo Jutu li ike a.
suno li lon meso la, mi moku e waso lon tomo lape li tawa tomo lipu. tenpo mute la mi tawa tomo pi jan suli tan ni: jan li kalama ala la mi ken pali pona. taso tenpo ni la, mi ken ala lon ona la mi tawa tomo pi jan lili. mi kama sona e ni: tenpo mute la supa lon mi pi tomo ni li lili ike. supa ni la mi ken lukin e selo2 tomo e jan musi la mi wile musi kin. ni la mi tawa supa lon insa tomo lon insa supa lipu.
tomo pi jan lili la mi lukin e lipu kule pi jan lili. tenpo pini la mi lukin e ona tan musi taso. tenpo poka la jan ala pi tenpo mi li lukin e ona la mi pilin e ni: mi suli la mi wile ala lukin e lipu pi jan lili. taso, pilin mi li ike. lipu mute li suli la mi jo ala e tenpo e wawa tawa lukin ona. taso lipu kule pi jan lili li lili la mi ken lukin e ona lon tenpo lili kepeken wawa lili li ken kama sona. lipu mi li toki e nasin sona e nasin lon tan lipu suli ante. https://m.blog.naver.com/PostView.naver?blogId=icomar&logNo=223774164984&proxyReferer=https:%2F%2Fwww.google.com%2F&trackingCode=external
2025-08-17
6:17pm
mi lon telo la wile pi pali musi li lon!
tomo sona pi toki Inli la, tenpo mun ale la utala sona li lon. kulupu mi lon tomo sona ni la jan ale li pali e wile ona li lon ala nasin wan. kijetesantakalu Ila la, ona li pali e musi lon tenpo poka pi utala sona. jan musi li ken pona tawa utala sona. ni la, mi wile pali e ijo sama!
ona li ni: kulupu pi tenpo mi lon tomo sona ni li tawa ma ante nasa li lawa e ale ma li ike e jan ma lon tenpo mun wan. jan musi tu wan li wile weka e lawa ike ona. jan li ni:
jan Enke (EmK) li lon kulupu ni lon tenpo pini. ona li awen sona e kulupu li toki tawa kulupu. ona li olin e utala toki e kulupu Straykids. musi la ona li olin pakala e jan li wile moli e ma ale.
jan Ese (Esel) li lon ma Mewika li lon kulupu lon tenpo pini. ona li toki pona tawa jan ale li wawa lon pali ona. ona li ken sitelen pona li olin e musi 화산귀환.
jan Sisin (Sijin) li lon kulupu lon tenpo pini. tenpo pini weka la ona li mije taso lon kulupu. ona li ike tawa jan Enke tawa jan Ese.
jan Sonja (Sonja) li jan sin.3
nasin seme la kulupu li lawa e ma
kijetesantakalu Ila li wile ala pali tawa utala sona pi tenpo poka la ona li musi kepeken ilo ona li kama lon linluwi pimeja.4 ilo li tawa ma sin e kijetesantakalu Ila, taso ona li sona ala e toki jan la kijetesantakalu Ila li kama e jan Awa. jan Awa li sona e nasin toki la ona tu li kama sona e toki. kijetesantakalu Ila li kama sona e wawa pimeja lon ma ni la ona ale kulupu li ken pona lon utala sona.
lon la mi ken toki e ni ale lon lipu ante anu seme
2025-08-19
8:51pm
mi pini e lipu wile mi aaaa
wile wan li awen lon: o pana e lipu lon nasin pona
ni li wile e ilo suli mi taso mama li jo e ona
tenpo poka la mi toki sin tawa jan linluwi. mi toki e ijo nasa la mi pilin ike lili lon tenpo. taso suli ala a :D
pona la, mi pana ala e mani tawa lipu ni la jan li ken ala lukin e lipu ni. ni la mi ken nasa sama wile mi.
2025-08-20
4:22pm
tenpo suno ni la, ijo mute a li lon. tenpo ni la mi o pali la mi o sitelen lon tenpo kama taso mi wile sitelen e ni:
jan sin li kama lon kulupu li pana e sona. ona li toki: "tenpo ala la mi kama e telo sijelo loje lon luka mi" jan lili wan li toki: "ni la telo sijelo loje li lon ilo kipisi sina anu seme" jan sona li toki: "jan li kipisi e jan kepeken ilo la telo sijelo loje li tawa luka kin" ni la mi toki: "ni la sina wawa la sina ken kepeken ilo kipisi li ken pana ala e telo sijelo loje lon luka sina" jan sona li toki: "ala a. o alasa ala e tan, mi wile toki e ni taso: mi pakala ala e sina ale"
2025-08-29
5:10pm
tenpo poka la mi lukin e sitelen musi ni tan ma Mewika. ona li sitelen pakala e ma Anku. tan seme la ma Powan li ma kasi telo?
mi o seme? ken la mi o lukin e lipu. ken la mi o nasin e pali mi.