lon li pona
pipi lili suwi
la1 mi kute e kalama musi ni lon tenpo poka. toki li sama ni:
seme li lon kiwen, ni li pipi lili suwi
seme li lon kiwen, ni li pipi lili suwi
o lukin e tawa pi pipi musi suwi ni
seme li lon kiwen, ni li pipi lili suwi
tan ala la kalama li awen lon lawa mi. alasa lili la mi kama sona e ni: kalama ni li tan kalama pi jan lili lon ma Tosi. nimi kalama li 'auf der Mauer, auf der Lauer'. lon alasa la mi lukin e jan wan tan ma Anku. ona li toki e kalama ni e kalama ante pi ma Tosi. mi kama sona e ni kin: kalama musi '나비야' pi ma Anku li tan ma Tosi. toki ni tan jan sama li musi kin tawa mi.
kalama ni la, mi pilin e ni: kalama 'auf der Mauer, auf der Lauer' li sama mute kalama '동네 한 바퀴' pi ma Anku. kalama mute pi jan lili lon ma Anku li tan ma ante la, ken la kalama '동네 한 바퀴' li sama anu seme? mi alasa la ona li tan kalama 'le coq est mort' pi ma Kanse. taso, jan ni la kalama 'auf der Mauer, auf der Lauer' li sama lili kalama 'the itsy bitsy spider'. tan seme la ona ale li sama a?
utala sitelen pi pilin lipu
tenpo suno kama la, utala ni li lon tomo sona. tomo sona mi pi tenpo pini la utala sama la mi anpa e jan ale. tomo sona mi pi tenpo ni la, utala sama ni li tenpo nanpa wan tawa mi la mi wile sama.
ni la utala sitelen tan lawa pi kulupu pi tomo sona li lon lawa mi. mi pana e sitelen tawa utala ni lon tenpo pini, taso toki ala li kama tan utala ni tawa mi. sitelen mi li ike suli la ken suli la mi kama e ala tan utala ni. taso suli ala a, sitelen ale mi li ike.
kulupu pali pi lipu sona
mi lon kulupu ni lon tomo sona: ona li pali e lipu sona. tenpo suno tu kama la, kulupu ni li open sin. mi pilin pona mute tawa kulupu tan ni: mi ken sitelen e ijo mute lon lipu ni. ona li lon toki Inli la jan mute li toki Inli ike, taso mi ken toki Inli pona la mi wile pona tawa jan ante kepeken nasin sin mi. ni li musi pona tawa mi.
lipu pi sike kama #MAMLW la, ijo suli lipu li ni: kulupu pali li ante e musi. musi ante mi li sitelen tawa K-Pop Demon Hunters. mi pini sitelen e ni!
tan ni kin la pali lipu pi sike ni li musi tawa mi: jan lawa la mi ken sitelen e sona toki lon lipu. tenpo poka la mi sitelen e toki pona (ni la jan ale li ken sona e ni: mi sitelen e ona a)
utala toki
tomo sona pi toki Inli la tomo sona ale pi kulupu sama lon ma Anku li utala toki. mi lon ona kin!
toki Inli la mi open e toki kepeken nimi 'so'. toki Anku la mi open e toki kepeken nimi '근데'. ni la mi open e toki pona kepeken nimi 'la'↩