2025-10-03
mi tawa lape la, mi wile sitelen e ijo lili ni: tenpo suno ni la mi seme.
- open suno la mi sitelen e nasin pali pi lipu linluwi tawa jan poka. wile mi la mi en jan poka li kulupu li sitelen lon linluwi, taso ken lawa mi li ike :/
- utala sona li pini la, mama li toki e ni: mi o pali nanpa. tenpo pi utala sona la mi pali nanpa ala la mi sona ala e nasin pali. mi wile pali e nasin ni lon tenpo kama la mi pali lon ijo nanpa pi utala sona. wile sona pi pali mi li nasa e ijo ni la, ni li musi mute tawa mi.
toki pali mi la
lon toki pali mi la, nimi ale li sama nimi lon poka 'en' anu 'e' pi toki pona1. jan li ken pana e nimi lili namako sama nimi 'li' pi toki pona. taso ni la kon li ken ante mute, sama ni: toki 'mi moku' la moku li ken sama mi, anu mi ken moku e ijo. ni la kon pi nimi 'moku' li ante lili.
pilin mi la, kon li ken ante lon nasin tu:
- nanpa wan la, toki '[wan] li [tu] e [mute]' la [mute] li kama [tu] tan [wan]. taso ijo [mute] li ken lon ala toki, sama ni: toki 'mi moku' la mi moku e ijo, taso mi toki ala e ijo ni.
- nanpa tu la, toki '[wan] li [tu]' la [wan] li kama sama [tu].
taso mi ken tu e ijo sewi nanpa tu, sama ni:
- nanpa wan tu la, toki '[wan] li [tu]' la [wan] li awen sama [tu] lon tenpo toki. awen [tu] pi ijo [wan] li suli.
- nanpa tu tu la, toki '[wan] li [tu]' la [wan] li awen kama [tu] lon tenpo toki. kama [tu] pi ijo [wan] li suli.
ken la, nasin ni li ken lon ijo sewi nanpa wan, sama ni:
- nanpa wan wan la, toki '[wan] li [tu] e [mute]' la kama [tu] pi ijo [mute] tan ijo [wan] li suli.
- nanpa tu wan la, toki '[wan] li [tu] e [mute]' la awen [tu] pi ijo [mute]
ni la, toki pali mi la nimi lili li ken tawa ijo ni e nimi ante. nimi lili wan li tawa ijo wan e nimi. ken la, tenpo kama la mi kama sona e nimi pi pali ni. ken la toki Inli la nimi 'derivation' en nimi 'lexical aspect' li ken pana e sona.
mi sona ala e ni: nimi 'noun' en nimi '명사' (ona li kon sama) li seme↩