ma pona pi lon ala
tenpo la, mi pilin e ala. mi pilin e ni: mi pali e ala. mi jo e ala. mi pona ala li pakala taso li moli insa. mi wile e ni: mi pakala ala li moli insa ala li awen pona lon tenpo ale. mi wile e ni: tan open la ale li pona, pini la ale li pona. taso ni li lon ala. ni la, mi pali e ijo sin.
ona li ken tomo sona pi pona mute. jan ale li pali wawa li sona e nasin li ken pona e mi. mi kin li sama li pali poka. kulupu li pana e sona sin e sona nasa li pona e lawa mi. tomo li pona mute. kon li pona mute. kasi li pona mute. len li pona mute.
ona li ken ma pi pona mute. ona la esun en lawa li pakala ala (ante tenpo ni a a a) li pana e ken tawa jan ale. nasin kulupu pi nasa pona li tan tenpo pini li awen lon. ijo sin en musi mute li lon. ale li pona mute.
taso ike la ma ni li lon ala. ma ni li ken ala lon. ijo li ken ala pona lon tenpo ale. ijo li pona la ona li ike lon tenpo. kin la ijo li pona la ijo poka li ken pona ala. ijo li ike la ijo poka li ken pona ala. ale li tan pali ijo. ijo li mi la ale li tan pali mi. mi o pini sitelen taso e poka pi pona mute o pali e ijo pi pona lili. taso tenpo la mi wile ala. tenpo la mi pilin e ni: ale li ken ala kama pona. taso ona li ken kama pona lili lon tenpo suli. ni la, jan Awa o pali lon tenpo ni a.
...taso mi ni lon tenpo lili li pali musi wawa lon tenpo suli la, ona li ken toki musi pona :)