mi ale li awen kama sona e toki
tenpo la, ken toki jan li lukin sama ni:
- toki mama: jan li kama sona e ni lon tenpo lili ona tan mama. ona li ken toki wawa kepeken ni tan tenpo open. ona li sona e ale toki li lawa e toki.
- toki wawa: jan li ken toki wawa e ni. ken la, toki ni li toki mama jan ala. taso jan ni li toki wawa la ona li ken lawa e toki... anu seme? toki ni li toki mama pi jan ante la jan ante ni li lawa nanpa wan e toki. toki li toki mama jan ala la, ona o awen sama jan pi toki mama.
- toki pi kama sona: toki ni li pona ala tawa jan la ona li kama sona e toki ni. jan li lawa ala e toki o alasa sama jan pi toki mama.
tenpo la, nasin ni li sama ni: toki ni li toki mama jan la, jan ni li sewi nanpa wan li sona ale. jan li kama sona e toki ni la, jan ni li anpa li sona ala. ni la, jan suli tan ma Mewika pi lukin Mewika1 li toki e 'english is hard' la jan mute li pilin e ni: lon ala a. jan ni li sona e ale pi toki Inli. toki Inli li toki mama ona! toki Inli pi jan ni li ante tawa nasin pi jan mute la, pilin pi jan mute la toki li kama ante.
taso jan pi sama mi la, seme? tan open la mi kute e toki Anku e toki Inli lili la mi ken sona wawa e toki Inli, taso mi wile toki Inli la nimi li kama ala tan mi. mi ken toki Inli pi wawa sama toki Anku la, mi sike e suno lon tenpo luka luka wan. mi ken toki Anku wawa la, mi sike e suno lon tenpo tu. tenpo sitelen la mi ken toki wawa sama jan ante kepeken toki Inli. taso mi awen lon ma Asija lon tenpo ale la, mi en mama mi li tan ma Asija la, jan mute la toki Inli li toki mama mi ala. mi toki e 'english is hard' la jan mute la toki Inli li pona ala tawa mi. mi toki Inli ante tawa nasin pi jan mute la, jan li pilin e ni: toki Inli mi li ike. mi sona e ni tan ni: tenpo pini la mi pilin sama tawa toki Inli pi jan ante. jan mute la, mi awen kama sona e toki Inli taso mi pini kama sona e toki Anku. taso mi ken toki kepeken wawa sama e ni tu! lon la ante li lon. mi ken toki pona e pilin mi e toki pali mi e ijo linluwi kepeken toki Inli. mi ken toki pona e ijo pi ma mi pi linluwi ala kepeken toki Anku.
pilin mi la, jan ale li awen kama sona e toki. toki li toki mama jan la, ona li sona ala e nimi ale e nasin toki ale. jan li ken toki pona lon ijo wan li ken toki pona ala lon ijo ante kepeken toki sama. ni la, mi wile toki e ni: o sewi ala o anpa ala e jan tan wawa toki ona. o toki ala e ni: jan pi toki mama li sona e ale toki.
ni li ken ante tawa jan mute, taso tenpo mute la ni li ike.↩