jan Awa li wile kama sona e seme?
mi open lon ijo lili.
ken kama sona tan pilin ante
tenpo ni la mi lukin e lipu '모국어를 위한 불편한 미시사'. ona li toki e ni: tan kon pi kulupu ante (suli la kulupu Nijon en kulupu pi toki Inli) la toki Anku en kon Anku li pakala. mi sona lili e toki lipu lili li sona ala e toki lipu ante. taso ona li pana e kon sin tawa mi, tan ni: tenpo mute la pilin mi la wan toki li musi tawa mi. (o lukin e sitelen Inli mi la sina sona) pilin mi la toki li kama lili li weka e kon la kon sin li kama tan jan toki la kon li awen. taso ken la ala. kon mute li moli lon tenpo poka tan wan kulupu. mi o lukin lon ni.
tenpo kama la, mi wile awen kama sona e ijo sin ni: ona li sama ala pilin mi. kin la mi wile kama sona lon ijo mute lon ijo suli tawa mi ala.
nimi pi toki Anku
lon lipu sama la, jan lipu li toki e ni: toki Anku la nimi mute pilin li lon, taso tenpo ni la jan mute li sona ala e nimi ni li kepeken e 'pilin pona' (기분 좋다) e 'pilin ike' (기분 나쁘다) taso. mi lukin e nimi pilin pi pana ona la, ken la mi wile kama sona e nimi ni. tan seme? tan musi \^^/
lipu la toki li lawa e pilin. mi kute e ni lon tenpo mute a, taso mi o lukin sin lon ni! ante la, jan mute la kon pi toki Anku en kon pi toki pona li kama lon ijo ni sama (toki li lawa e pilin) taso ona li kepeken ni lon nasin ante. toki pona la nimi li mute la ni li nasa tawa lawa. nimi lili li ken kon sama nimi suli. jan mute li sona pona ala e kon pi nimi suli la, kepeken nimi lili la jan li ken sona e kon ale pi toki ona. toki Anku la, toki pi jan sona la nimi lili li jo e kon suli la jan li kulupu e kon lili mute li ken ala lukin e kon lili wan. ni la jan o kama sona e nimi mute tawa sona pi kon lili mute. musi a! taso ona tu ale la sona pona pi kon nimi li suli.
kulupu Anku pi tenpo suli
tenpo mute la kon li kama tan ma pi suno pini li lawa e ma ale, taso mi ken kama sona e kon pi kulupu mi anu seme? kin la tan pona pi sitelen Ketejan (케데헌 anu K-Pop Demon Hunters) la jan mute li wile kama sona e kon Anku.
mi sona ala e nasin pi kama sona la mi wile e ni: mi kama sona e ni lon tenpo nasin ala lon tenpo lili ale pi ken mi.
poka la, sitelen \^^/ li kama pona tawa mi. (lukin la sitelen ni li jo e luka wan lon poka wan, taso lon la ona o jo e luka tu wan lon poka pi sitelen Lasina open) tan seme? ken la sitelen :> en sitelen :D en ijo sama li kama sin ala tawa mi.
o awen pona! ['ㅇ']b