sina ken ala pana e pona la, o weka ala e ilo tan jan lili

2025-08-11

lipu ni li kepeken nimi mute pi toki pona ala li ante e nimi ni tawa kalama pi toki pona. sina wile sona e nimi ni la, o lukin e kulupu pi nimi ijo

ma ale la, jan ale li lukin e ilo. ni la, mama li wile e ni: jan lili li jo ala e ilo. ni la pona suli li ken lon. taso ante la ike suli li ken lon.

pona suli li ni: mama li wile weka e ilo tan wile ni: jan lili li musi li kama e ijo sin. ilo la ale li awen li nasa e lawa jan. taso ilo ala la ijo sin pona li lon. ona li nasa ala e lawa li awen ante li toki e ijo jan. ilo la jan li pilin ike tan ni: jan ale li pona tawa ona li musi. ilo ala la jan li sona e ni: ona o pona ale ala. ni li pona suli. ilo Insaken en ilo Jutu lili li ken ala pakala e lawa jan. jan lili li ken sama jan lili li ken musi li ken pilin pona li ken wile pona ale ala. mi lukin mute e ni lon ilo li pilin e ni: a jan ni li ken musi li ken pona. ken suli la, mama pi ma mi li lukin e ni li pilin sama kin. taso ona li ni la ike suli li lon.

mi lon ma Anku lon poka pi tomo sona mute. ma mi en ma poka mi la, mama li wile e ni: kili ona li pali pona lon tomo sona. wile la jan kili li pona ale a. mama li tawa tomo sona mute¹ e jan kili li pana e sona mute e pali mute tawa ona. jan kili li pilin ike li wile lape li wile musi lon tenpo. ona li ken ala musi lon tenpo suli la ona li alasa e musi lili ilo. jan lili pi pali mute la, ilo li musi li nasa pona li sama ala ma nasin ona pi ilo ala. tan ona la jan lili li pilin pona li kama nasin. tenpo la ona li kama e wile pi tenpo kama li alasa e ni kepeken ilo.

mi wile toki e mi e jan mi. mi kepeken e ilo mi lon tenpo mute a. tenpo mute la mi ni tan pali mi pi tomo sona. taso tenpo pini la mi ni ala li kepeken mute e lipu Wesi e lipu sitelen. ona li pakala a e lawa mi, taso suli li ni: mi kama sona e ijo pi tomo sona ala. tomo sona li musi ala tawa mi. tomo sona la mi o nanpa pona o sama jan pona o kama sona e ijo sama jan ante. jan li toki e ni: mi o sona e wile mi pi tenpo kama. taso mi kama sona e ijo sama lon tenpo ale la mi sona ala a! mi wile ala kama jan misikeke sama wile pi jan ale.² open pi tenpo ilo mi la mi sona ala e ijo ni, taso mi kama sona e ijo sin. mi kama sona e ijo MBTI e ijo Enneagram li kepeken ni tawa pali jan pi toki musi. jan li toki e ijo mute ni: lon en jan li seme. tenpo li tawa la mi alasa e kon li kama sona e sona toki. ni la mi wile kama jan pi sona toki li kama sona e nasin pi pali toki kin. kin la, mi kama sona e lipu sitelen li pali e lipu ni.

jan poka mi Ese³ li olin e sitelen li ken pali pona e sitelen li wile kama mani tan ona lon tenpo kama. ni la ona li pali lon ilo Jutu lon poka jan ante. mama li wile ala e ni la jan Ese li len e ona tan mama⁴, taso ni li ike ala tawa mi. nanpa wan la ona li pali tawa wile ona pi jan ante ala. nanpa tu la ona li ken pali ni li ken awen pali e wile pi jan ante li tenpo pona. nanpa tu wan la mama li pona ala lon tenpo ale.⁵

mi toki ala e ni: ilo li pona ale. ilo li ken ike suli tawa jan lili. taso ona li ike ala tawa ni: jan o pali mute o musi ala o pona ale tawa jan ale. ike la mama pi ma mi li weka e ilo tan jan lili tan ni taso. ‘a, jan lili mi li pali ala tan ILO IKE NI!’ pona la, ilo li weka la musi ante pona o lon. taso, ma mi la ni li kama ala.

jan poka mi Enwa li pona. sona pi jan ale la, ona li ken ala pona ale. taso ona li awen pona. ona li sona ala e nasin ona, taso ona li pali pona li tenpo pona li pona tawa jan ante li pilin pona li wile kama sona tan ijo mute.⁶ kin la, ona li olin e sitelen musi li pali e sitelen ona. ona li kama e sitelen musi e sona sitelen tan ilo. taso ilo la mama ona li nasa. tenpo open la jan Enwa li ken kepeken ilo ona lon tenpo ilo wan tan mama. ni la jan Enwa li ni. ni la mama li toki ala tawa jan Enwa li ante e nasin tawa ni: ona li ken kepeken ilo lon tenpo ilo lili mute mute. tenpo lili tawa la mama li ante sin e nasin tawa ni: tenpo ilo lili mute taso li ken.

ken la, sina pilin e ni: ‘tan seme la ni li ike? ken la ona li kepeken ike e ilo.’ nanpa wan la, jan Enwa li ken musi. nanpa tu la, mi toki e ni lon tenpo pini la, mama pi jan Enwa la jan Enwa o musi ala. ona li lukin e jan Enwa la jan Enwa li pali ala la ona li toki suli ike tawa jan Enwa. tan la? ona li ken ala ‘pali lon ona taso’. ike a.

mama ante pi sona mi la, ona li len e ilo ale tan jan lili li kepeken e ilo ni. ona li pana e pali mute a tawa jan lili. jan lili ni li lon tomo sona LTW a⁷ pi wile ona ala. kin la, mama ni li lukin e jan lili kepeken ilo sitelen. jan lili li pali ala la ona li toki ike. ken la mi sona lili e pilin ona tan ni: jan lili tu li lon, taso jan wan li ike suli li pali ala li ike tawa jan ante li pakala e ijo. mama li pali ale tawa pini ike, taso jan lili li pini ala. jan mute li kute e ni la ona li pilin e ni: jan lili ni li ken jo e lawa kule. ni ala ni la, jan ante o alasa pona e jan ni anu seme? taso mama li pilin e ni: ni la ona li pilin ike la ona o ni ala. ona li wile lawa taso e jan lili.

ni li ike suli li wan taso tawa sona mi, taso pilin mi la mama mute li sama ni. mi wile toki e ni tawa mama: weka ilo li pona la, ijo ante pona o lon. sina ken ala ni, taso ilo li lawa e jan lili sina la, o toki tawa ona. o kama sona e ni: tan seme la ona li kepeken ilo. o toki e ni: seme li lon la sina lawa e kepeken ilo ona. nasin seme la sina wile lawa. mi mama ala, taso mi jo e mama li sona e jan poka. mama ona li lawa e jan poka ni. sina wile weka e ilo tan jan lili la, o ni pona.

ken suli la pilin mi li ike tawa nasin mama pi ilo ala, tan ni: mama li weka e ilo tan jan poka mi la jan ala li kama pona li pilin ike suli taso li pali mute taso. tenpo tu anu tu wan la mama li lawa meso e ilo pi jan poka mi la ona li pona meso. tenpo mute la mi en jan poka mi li kama nasin tan ilo.

tenpo suno LLL li tawa la namako: ken la mi wile sitelen sin e ni a... msa

#sitelen